Сместен на историското брдо Гумење, Музејот на НОВ е отворен во 1989 година како спомен обележје на борбениот дух на Крушево. Поставката прави фасцинантен мост меѓу двата Илиндена, револуционерната 1903 и ослободителната 1944 година.

Што ќе видите во Музејот?

• Уметничко ремек -дело: Целиот ѕид на музејот го краси грандиозен мурал изработен од Борко Лазески во 1986 година. На таванот е претставено сонцето како култна симболика — три вкрстени раце ги претставуваат трите дела на Македонија, низ кои тече реката Вардар.
• Оригинални експонати: Тука се чуваат автентични предмети од партизанското движење:
  • Оригиналното знаме на одредот „Питу Гули“;
  • Партизанска аптека и медицински материјали;
  • Оружје, документи, прогласи и машини за пишување од тоа време.
• Порака на слободата: Впечатливиот натпис во музејот јасно го дефинира духот на градот: „Слободата е мила, слободата е се, за неа се живее за неа се мре“.

Историски контекст: Одредот „Питу Гули“

Музејот го документира патот на крушевските партизани кои во 1942 година го формирале одредот „Питу Гули“, именуван по легендарниот херој од Мечкин Камен. Крушево со гордост се сеќава на своите народни херои: Манчу Матак, Наум Наумоски – Борче и Златко Билјаноски – Михајло.